သီတဂူကေတုမတီဗုဒ္ဓတက္ကသိုလ်သည် သီတဂူဗုဒ္ဓတက္ကသိုလ်များနှင့် သီတဂူဆေးရုံတော်များ အဓိပတိ သီတဂူဆရာတော်ဘုရားကြီးဦးဆောင်တည်ထောင်တော်မူသော သီတဂူဗုဒ္ဓတက္ကသိုလ်များ၏ စတုတ္ထမြောက် တက္ကသိုလ်ဖြစ်ပါသည်။
သီတဂူဟူသည် တည်ထောင်သူ ဆရာတော်ကြီး၏ ထင်ရှားသော ဝိသေသန အသုံးအနှုန်းဖြစ်ပြီး အေးချမ်းသော လရောင်အလင်းဟူသော အဓိပ္ပါယ်ဖြစ်ပါသည်။ ကေတုမတီဟူသည် ဤတက္ကသိုလ်တည်ရှိရာ နေရာ၏ ရှေးက ထင်ရှားခဲ့သော မင်းနေပြည်တော်အမည်ဖြစ်ပါသည်။ သတ္တိ၊ဗျတ္တိ လက်ရုံးရည် နှလုံးရည်တို့နှင့် ပြည်စုံသူတို့ စုဝေးတည်ရှိရာ မြို့နေရာဟူသော အဓိပ္ပါယ်ဖြစ်သည်။
ထို့ကြောင့် ဦးဆောင်တည်ထောင်သူ ဆရာတော်ကြီး၏ ထင်ရှားသော ဝိသေသနအမည်နှင့် ရှေးယခင်က ထင်ရှားကျော်ကြားခဲ့သော ဤနေရာဒေသ၏ အမည်နာမနှစ်ခုကို ပေါင်းစပ်ကာ သီတဂူကေတုမတီ ဗုဒ္ဓတက္ကသိုလ် ဟု အမည်မှည့်ခေါ်ခြင်းဖြစ်ပါသည်။
ပညာလိုလား မှီခိုအားထားလာသူတို့အတွက် မေတ္တာရိပ်ဖြင့် အေးချမ်းနွေးထွေးစေပြီး အသိပညာ၊ အတတ်ပညာ တို့ဖြင့် နှလုံးသားလှစေမည်ဟူသော အဓိပ္ပါယ်ဖြစ်ပါသည်။